මේ වන විට ඇතිව තිබෙන අර්බුදකාරී තත්ත්වය මධ්‍යයේ ජනාධිපති ගෝඨාභය රාජපක්ෂ මහතා ඉලක්ක කරගනිමින් සමාජ මාධ්‍ය තුළ හෑෂ්ටැග් දෙකක් තරඟකාරී ලෙස පැතිරෙමින් පවතිනවා.

ඒ අනුව #GoHomeGota හෑෂ්ටැගය මීට දින කිහිපයක පටන් ක්‍රියාත්මක වන අතර ට්විටර් හා ෆේස්බුක් සමාජ මාධ්‍ය තුළ එමගින් බලකෙරුණේ ජනාධිපති ගෝඨාභය මහතාට බලය අතහැර යළිත් ඇමරිකාව වෙතම යන ලෙසයි.

එම හෑෂ්ටැගය භාවිතා කරමින් ඇතැමෙක් ජනාධිපතිවරයාගේ පුත් මනෝජ් රාජපක්ෂ අමතමින් සටහන් කර තිබුණේ සිය පියාව යළිත් ඇමරිකාවේ ඇති ඔවුන්ගේ නිවස වෙත කැඳවා ගන්නා ලෙසයි.

කෙසේ වෙතත් මීට ප්‍රතිචාර දක්වමින් ආණ්ඩුවට හිතවත් සමාජ ක්‍රියාකාරීන්ද ජනාධිපති ගෝඨාභය රාජපක්ෂ මහතාට සහය දක්වන හෑෂ්ටැගයක් නිර්මාණය කර තිබෙනවා.

#WeAreWifGota හෑෂ්ටැගය යටතේ ඔවුන් පවසන්නේ ශ්‍රී ලංකාවේ වත්මන් ආර්ථික අර්බුදය විසඳීමට ජනාධිපති ගෝඨාභය රාජපක්ෂ මහතාට හැකි බවයි.

මෙම හෑෂ්ටැගය ප්‍රසිද්ධියට පත්කරන රජයේ ප්‍රවෘත්ති දෙපාර්තමේන්තුවේ අතිරේක අධ්‍යක්ෂ ජනරාල් මිලින්ද රාජපක්ෂ මහතා පවසන්නේ රට මුහුණ දී ඇති බරපතලම ආර්ථික අර්බුදය අප රටට පමණක් නොව මුළු ලෝකයම මුහුණ දෙන අර්බුදයක් බවයි.

කෙසේවෙතත් පවත්නා දැඩි ආර්ථික හා සමාජීය අර්බුදය යටතේ එළැඹෙන 16 වන බදාදා ජනාධිපති ගෝඨාභය රාජපක්ෂ මහතා ජාතිය ඇමතීමට නියමිතයි.

By admin